ᓄᓇᕕᐅᑉ ᓄᓇᒥᒃ ᑎᒍᒥᐊᕐᑎᖏᑦ

ᕿᒃᑭᕆᐊᖅ ᓄᓇᒥᒃ ᑎᒍᒥᐊᕐᑎᖓ ᐊᑯᓕᕕᐅᑉ

Qekeirrriaq LHC of Akulivikᐊᑯᓕᕕᒃ ᑐᑭᓕᒃ “ᑲᑭᕙᐅᑉ ᑲᐴᑎᖓᓂᒃ”, ᐃᓄᑐᐃᓐᓇᓄᑦ ᓄᓇᓕᒋᔭᐅᔪᖅ ᑯᐯᑉ

ᐊᑐᐊᕐᓯᒋᐊᓛᕆᑦ

ᐊᑯᓕᕕᒃ ᐊᑎᖃᓚᕿᔪᖅ ᓄᓇᐅᑉ ᓴᓇᒪᓂᖓᑕ ᖃᓄᐃᓕᖓᓂᖓᓄᑦ. ᓄᕗᒃ ᑕᓯᐅᔭᕐᔪᐊᒨᕐᑐᖅ ᑲᑭᕙᓪᓗᑐᐊᓘᔭᕐᒪᑦ ᓴᓂᕋᕐᒥᒍᑦ ᐃᒪᕐᑕᖃᕐᓱᓂ. ᓯᕿᓂᐊᓄᑦ ᐃᓪᓗᑯᑖᑦ ᑰᖓᑕ ᐸᖓ, ᑕᕐᕋᖓᓄᓪᓗ ᑲᖏᕐᓱᐊᓗᒃ ᐃᒪᖓ ᐃᑎᔫᑦᓱᓂ ᐅᒥᐊᒃᑯᕕᑦᓯᐊᕌᓗᒃ ᓄᓇᓕᒻᒥᓗ ᐅᕐᖁᐊᓕᓂᕐᒦᑎᑦᓯᓱᓂ. ᓯᑯ ᑕᑦᓱᒪ ᓄᕗᑉ ᓴᓂᐊᓂ ᓱᐱᑦᓴᐅᑎᒋᐊᐱᓲᖑᒻᒪᑦ ᐅᐱᕐᖓᓴᒥ, ᒪᙯᕝᕕᓯᐊᕌᓘᓚᕿᔪᖅ. ᓄᓇᔭᖓ ᐊᑯᓕᕕᐅᑉ ᑕᑯᑦᓴᐅᑎᑦᓯᔪᖅ ᓄᓇᐅᑉ ᓯᑯᐊᓘᓚᐅᕐᓂᕕᓂᖓᓂᒃ: ᖃᑯᕐᑕᕖᖕᖓᒥᒃ ᓯᐅᕋᓕᒃ, ᓯᐅᐱᕈᕕᓂᕐᑕᓕᒻᒪᕆᐅᐅᑦᓱᓂ.

1933-ᖑᑎᓪᓗᒍᒍᖅ, ᑲᒻᐸᓂᒃᑯᑦ ᐊᓪᓚᖁᑎᖏᓐᓂ, 140-ᓂᒃ ᐃᓄᑦᑕᖃᓚᐅᕐᑐᕕᓂᖅ ᕿᑭᕐᑕᔪᐊᒥ. 1952-ᒥ, ᓂᐅᕕᕐᓂᐊᕕᒃ ᑌᑲᓃᒃᑐᖅ ᐅᒃᑯᐊᑐᕕᓂᖅ, ᑖᒃᑯᐊ ᐃᓄᐃᑦ ᑖᕙᓂ ᓄᓪᓚᖓᕕᖃᓕᕐᑐᕕᓃᑦ ᓅᒋᐊᖃᓚᕿᑦᓱᒋᑦ ᐳᕕᕐᓂᑐᒧᑦ, ᓂᐅᕕᕐᓂᐊᕕᖃᕐᓱᓂ ᖃᓂᓐᓂᐸᐅᓐᓂᒪᑦ.

ᑭᓯᐊᓂ ᑖᒃᑯᐊ ᐃᓄᐃᑦ ᓄᓇᒋᖕᖏᑕᒥᓅᑦ ᑕᒻᒪᕆᐊᖃᓚᕿᔭᕕᓃᑦ, ᐳᐃᒍᓚᐅᕐᓯᒪᓐᓂᖏᑦᑐᑦ ᐱᕈᕐᓴᕕᕕᓂᕐᒥᓂᒃ. 1973-ᖑᑎᓪᓗᒍ, ᐃᓚᒌᑦ ᐊᑕᐅᓰᑦ ᐅᑎᓕᕐᑐᕕᓃᑦ ᑖᕗᖓ. ᐊᕐᕌᒎᓕᑐᐊᕐᒥᒪᑦ, ᐊᒥᓱ ᒪᓕᓯᔪᕕᓃᑦ ᐊᑕᐅᑦᓯᑯᓪᓗ ᐊᑯᓕᕕᒻᒥ ᓄᓇᓕᓕᐅᖃᑎᒌᓕᕐᑐᕕᓃᑦ.

ᑎᓕᔭᐅᒪᐅᑎᖓᑦ

ᓄᓇᒥᒃ ᑎᒍᒥᐊᕐᑏᑦ ᐱᖁᔭᕐᑎᒍᑦ ᓄᐃᑕᐅᒪᑦᓱᑎᒃ ᐱᓇᓱᐊᕐᕕᐅᕗᑦ ᓴᕐᕿᑕᐅᓯᒪᔪᑦ ᖄᖏᕐᓂᑯᓕᐅᕐᑎᐅᒐᑎᒃ ᑲᑐᑦᔨᖃᑎᒌᓐᓂᐅᓱᑎᒃ ᐊᓪᓚᓯᒪᔪᕐᑎᒍᑦ 5-ᒥ ᓄᓇᐅᑉ ᐃᓂᓪᓚᑕᐅᓯᒪᒍᑎᖓᑕ ᐱᖁᔭᖓᓂ, ᐊᐅᓚᑕᐅᒍᑎᓖᑦ ᑖᑦᓱᒥᖓ ᐱᖁᔭᕐᒥᒃ, ᔦᒻᔅ ᐯ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓᓂᒃ ᐊᒻᒪᓗ ᑯᐯᒻᒥ ᑲᒻᐸᓃᑦ ᐱᖁᔭᖓᓂᒃ.

ᓄᓇᒥᒃ ᑎᒍᒥᐊᕐᑏᑦ ᐃᓚᐅᔪᖁᑎᖏᑦ ᐊᖏᖃᑎᒌᓐᓂᒧᑦ ᐃᓚᐅᔪᐃᑦ ᐱᑐᑦᓯᒪᕕᖃᕐᓱᑎᒃ ᓄᓇᓕᒋᔭᒥᓂᒃ. ᑖᒃᑯᐊ ᑎᒦᐅᔪᑦ ᐃᓄᑐᐃᓐᓇᓅᓕᖓᑦᓱᑎᒃ ᓄᓇᓕᐅᑉ ᐅᓇᒻᒥᓲᑎᖏᓐᓂᒃ ᑭᒡᒐᑐᕈᑎᖃᕐᓱᑎᒃ.

ᓄᓇᒥᒃ ᑎᒍᒥᐊᕐᑏᑦ ᐃᓂᓪᓚᑕᐅᓯᒪᒍᑎᖏᑦ ᐊᐅᓚᑕᐅᒍᑎᖃᕐᑐᑦ ᐱᖁᔮᐱᓐᓂᒃ ᐊᖏᕐᐅᓯᒪᔪᓂᒃ ᐃᓚᐅᔪᓄᑦ ᓄᓇᒥᒃ ᑎᒍᒥᐊᕐᑎᓄᑦ. ᑕᒡᒎᓇ ᓄᐃᑦᓯᒍᓐᓇᑐᑦ ᑲᑎᒪᔨᓂᒃ ᐱᖓᓲᒍᓐᓇᑐᓂᒃ ᖁᓕᓪᓗ ᒪᕐᕈᓘᓗᑎᓪᓘᓃᑦ (ᓄᓇᐅᑉ ᖃᓄᐃᓕᖓᒍᒪᓂᖓ ᒪᓕᓪᓗᖑ) ᓂᕈᐊᕐᑕᐅᓯᒪᒍᓐᓇᑐᓂᒃ ᒪᕐᕉᓄᑦ ᐊᕐᕌᒎᓐᓄᑦ, ᑖᒃᑯᓇᓂ ᑲᑎᒪᔨᓂ, ᐳᕐᑐᓂᓭᑦ ᐃᓂᓕᐅᕐᑕᐅᒪᓲᑦ ᐊᖓᔪᕐᖄᒥᒃ, ᑐᖓᓕᖓᓂᒃ, ᐊᓪᓚᑎᒥᒃ ᑮᓇᐅᔭᓕᕆᔨᒥᓪᓗ ᑕᒡᒐᓂ ᑎᒥᒥ.

ᑲᑎᒪᔩᑦ ᐃᓗᓐᓈᒍᑦ ᐊᐅᓚᑦᓯᓂᕐᒥᒃ ᓄᑭᓖᑦ, ᓄᑭᖃᕐᓱᑎᒃ ᐱᓇᓱᑦᑎᑖᕈᓐᓇᓂᕐᒥᒃ, ᐱᖁᔮᐱᓕᐅᕈᓐᓇᓂᕐᒥᒃ, ᐱᓇᓱᐊᖃᑎᒌᒍᑎᐅᓂᐊᕐᑐᓂᒃ ᐊᑎᓕᐅᕐᕕᖃᕈᓐᓇᓂᕐᒥᒃ, ᑮᓇᐅᔦᑦ ᐊᑐᕐᑕᐅᓂᖏᓐᓅᓕᖓᔪᓂᒃ, ᐊᓯᖏᓐᓂᓗ, ᐃᑉᐱᒋᔭᖃᑦᓯᐊᒥᑦᓱᑎᓪᓗ ᐃᓗᓐᓈᒍᑦ ᑎᓕᔭᐅᒪᐅᑎᒥᓂᒃ, ᐱᕙᓪᓕᑎᑦᓯᒐᓱᐊᕐᑎᐅᓂᕐᒥᒃ ᓄᓇᓕᒥᓂᒃ.

ᐱᓇᓱᐊᕋᑦᓴᕆᓂᕐᐹᖏᑦ ᓄᑭᖏᓪᓗ ᐱᓯᒪᔪᑦ ᓄᓇᐅᑉ ᐃᓂᓪᓚᑕᐅᓯᒪᒍᑎᖓᑕ ᐱᖁᔭᖓᓂᑦ ᐱᑦᔪᑎᐅᑎᓪᓗᒋᑦ ᐅᒪᔪᕐᓯᐅᓂᕐᒨᓕᖓᔪᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᑕ ᓄᓇᖁᑎᖏᓐᓂ ᐊᒻᒪᓗ ᐊᓪᓚᑕᐅᓯᒪᕕᖓᓂ 3-ᒥ ᑖᑦᓱᒪ ᐊᖏᖃᑎᒌᓐᓂᐅᑉ ᐱᑦᔪᑎᐅᑎᓪᓗᒋᑦ ᐃᓚᐅᔪᐃᑦ ᑖᑦᓱᒧᖓ ᐊᖏᖃᑎᒌᓐᓂᒧᑦ. ᐃᓚᖃᕐᒥᔪᖅ, ᑕᒪᒃᑯᐊ ᐊᕙᑎᓕᕆᓂᕐᒧᑦ ᐱᖁᔦᑦ ᐱᕕᖃᕐᑎᓯᒻᒥᒪᑕ ᓄᓇᒥᒃ ᑎᒍᒥᐊᕐᑎᓂᒃ ᓂᑦᔮᕈᓐᓇᕕᖃᕐᑎᓯᑦᓱᑎᒃ ᕿᒥᕐᕈᔨᐅᔪᓄᑦ ᓴᕐᕿᑕᐅᓯᒪᔪᓄᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ.

ᐃᓚᐅᒍᓐᓇᕕᖃᕐᑐᑦ ᖃᖏᕐᓂᑯᓕᐅᕋᓱᐊᕐᓂᑯᑦ ᐱᓇᓱᐊᕋᑦᓴᓂ ᑎᒥᖁᑎᓕᐅᕐᓂᑯᑦ, ᐊᓯᐊᓂᐊᓪᓛᑦ ᑎᒥᐅᖃᑎᒥᓂᒃ, ᓄᓇᒥᒃ ᑎᒍᒥᐊᕐᑎᐅᖃᑎᒥᓂᒃ ᐃᒻᒥᓂᕿᔪᓂᐊᓪᓛᑦ ᐱᓇᓱᐊᖃᑎᖃᕐᓗᑎᒃ,

ᓄᓇᓕᐅᑉ ᓄᓇᒥᒃ ᑎᒍᒥᐊᕐᑎᖏᑦ ᑲᒪᒋᔭᖃᕐᒥᔪᑦ ᓄᑕᐅᓯᑎᕆᔨᐅᑦᓱᑎᒃ ᓄᓇᓕᒥᓂ ᐃᓚᐅᔪᐃᑦ ᐊᓪᓚᑕᐅᓯᒪᐅᑎᖏᓐᓂᒃ, ᑖᒃᑯᐊᓗ ᖃᑦᓯᐅᓂᖏᑦ ᐃᑉᐱᒋᑦᓱᒋᑦ ᑮᓇᐅᔦᑦ ᐊᒡᒍᑕᐅᓯᕙᑦᑐᑦ ᒪᙯᑦᑏᑦ ᓴᐳᒻᒥᔭᐅᒍᑎᖏᑎᒍᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᒍᑦ ᓴᕐᕿᑕᐅᒪᔪᕐᑎᒍᑦ.

ᑲᑎᒪᔩᑦ
Elisapi Irqumia
Lucassie Alayco
Lucassie Angiyou
Nowya Quissa
Joanasie Qaqutuk (President)
Markusi Anautak (Vice-President)
Nowra Quissa (Secretary)
Nowra Quissa (Treasurer)
ᑲᒪᔨᒻᒪᕆ
NameEli Angiyou
Emailqekeirriaqlhcakulivik@yahoo.ca
ᖃᐅᔨᓂᐊᕐᕕᓭᑦ
LHC PO BOX59
Postal CodeJ0M 1V0
Phone819-496-2640
Fax819-496-2629
ᑎᒥᖁᑎᖏᑦ

ᑐᓴᕋᑦᓭᑦ ᓱᓇᓱᐊᕐᓂᐅᓚᖓᔪᓪᓗ

ᓄᓇᓕᐅᑉ ᖃᓄᐃᓕᖓᖁᔨᒍᑎᖏᑦ