ᓄᓇᕕᐅᑉ ᓄᓇᒥᒃ ᑎᒍᒥᐊᕐᑎᖏᑦ

ᐋᕐᕿᕕᒃ ᓄᓇᒥᒃ ᑎᒍᒥᐊᕐᑎᖓ ᑕᓯᐅᔭᐅᑉ

Arqivik LHC of Tasiujaqᑕᓯᐅᔭᖅ ᐊᑎᖃᓚᕿᔪᖅ ᑕᓯᕐᔫᔭᕐᑐᒦᒐᒥ, ᐃᓄᑐᐃᓐᓇᓄᑦ ᓄᓇᓕᒋᔭᐅᔪᖅ ᑯᐯᑉ ᑕᕐᕋᖓᓂ. ᑖᓐᓇ ᓄᓇᓕᒃ ᑕᓯᐅᔭᐅᑉ ᑲᖏᕐᓱᖓᑕ ᓯᓈᓃᑦᑐᖅ 60 ᑭᓚᒥᑕᓄᑦ ᐅᖓᕙᒥᒃ ᖃᓂᑕᖃᕐᓱᓂ, ᓄᓇᖕᖑᐊᒥ ᓇᓗᓀᒃᑯᑕᐅᑉ ᐆᒪ ᒥᑦᓵᓂᑦᑐᖅ 59° 19′ 1″ N, 69° 34′ 46″ W. 2006-ᖑᑎᓪᓗᒍ, ᑕᓯᐅᔭᐅᑉ ᐃᓄᒋᐊᓂᖓ 249-ᒦᑐᕕᓂᖅ. ᐋᕐᕿᕕᒃ ᓄᓇᒥᒃ ᑎᒍᒥᐊᕐᑎᖓ ᑕᓯᐅᔭᐅᑉ ᓇᒻᒥᓂᖃᕐᑐᖅ 629.8 ᑭᓛᒥᑕᓂᒃ ᒪᕐᕈᕕᓪᓗᐊᓱᒍ ᑳᑕᑰᔨ 1 ᓄᓇᖁᑎᖏᓐᓂᒃ, ᐱᔪᓐᓇᐅᑎᖃᕐᕕᖃᕐᓱᓂᓗ, ᐃᓱᒫᓗᒐᖃᕐᓱᓂ ᑲᒪᒋᔭᖃᕐᓱᓂᓗ 3,840.3 ᐅᖓᑖᓄᑦ ᑭᓛᒥᑕᓂᒃ ᒪᕐᕈᕕᓪᓗᐊᓱᒍ ᑳᑕᑰᔨ 2 ᓄᓇᖁᑎᖏᓐᓂᒃ.

ᐊᑐᐊᕐᓯᒋᐊᓛᕆᑦ

ᑕᓯᐅᔭᖅ ᓯᓈᓂᑦᑐᖅ ᑰᑉ. ᐅᖓᓯᑦᑑᖏᑦᑐᖅ ᓇᐸᕐᑐᓕᒻᒧᑦ. ᑕᒫᓂ, ᓇᐹᕐᑐᐊᕈᐊᐲᑦ ᓄᓇᑐᐃᓐᓇᕈᑐᒥᒃ ᑲᑎᓯᔪᑦ. ᑕᓯᐅᔭᖅ ᑕᓯᕐᔫᔮᕋᒥ, ᑕᒪᑦᓱᒥᖓᓕᒫᖅ ᑕᓯᐅᔭᐅᑉ ᑲᖏᕐᓱᖓᑕ ᓄᓇᖁᑎᓕᒫᖓᓂᒃ ᐊᑎᖃᕐᑎᓯᔪᖅ. ᑕᒫᓐᓇᓗ ᖃᐅᔨᒪᔭᐅᒍᑎᖃᕐᑐᖅ ᐅᓕᓂᕆᑦᑑᐊᓗᒻᒪᑦ, 15 ᒦᑕᓄᑦ ᑎᑭᐅᑎᒍᓐᓇᑐᑦ ᐅᓕᓐᓂᖓ.

1950-ᓂ, ᑲᕙᒪᑐᖃᒃᑯᑦ ᑯᑦᔪᐊᒥ ᐃᓕᓐᓂᐊᕕᒻᒥ ᐅᒃᑯᐃᓯᒻᒪᑕ ᐃᓄᓕᕆᔨᖃᕐᑎᓯᓕᕐᓱᑎᓪᓗ, ᐊᒥᓱ ᐃᓄᐃᑦ ᑕᒡᒍᖓ ᓄᓇᓕᒻᒧᑦ ᓄᑦᑎᖃᑦᑕᓯᔪᕕᓃᑦ. ᑭᓯᐊᓂ ᑯᑦᔪᐊᖅ ᐆᒪᔪᖃᑦᓯᐊᖏᓐᓂᓴᐅᓂᑯᖓᓄᑦ, ᐊᒥᓱᑦ ᐃᓄᐃᑦ ᑲᕙᒪᒃᑯᓂᑦ ᑮᓇᐅᔭᑎᒍᑦ ᐃᑲᔪᕐᓯᔭᐅᒋᐊᖃᖃᑦᑕᓚᕿᔪᕕᓃᑦ. 1963-ᒥ, ᑯᐯᑉ ᑕᕐᕋᖓᓂᒃ ᑲᒪᕕᖓ ᑯᐯᒃᑯᑦ, ᑕᒪᑦᓱᒥᖓ ᐱᓀᓗᑕᐅᓕᕐᑐᒥᒃ ᐋᕐᖀᒋᐊᕋᓱᐊᕐᓱᑎᒃ, ᓄᑖᒥᒃ ᓄᓇᓕᒻᒥᒃ ᓄᐃᑦᓯᓯᔪᕕᓃᑦ ᑕᓯᐅᔭᒥ, ᐅᒪᔪᖃᑦᓯᐊᓂᕐᓴᐅᓂᑯᖓᓄᑦ.

ᑎᓕᔭᐅᒪᐅᑎᖓᑦ

ᓄᓇᒥᒃ ᑎᒍᒥᐊᕐᑏᑦ ᐱᖁᔭᕐᑎᒍᑦ ᓄᐃᑕᐅᒪᑦᓱᑎᒃ ᐱᓇᓱᐊᕐᕕᐅᕗᑦ ᓴᕐᕿᑕᐅᓯᒪᔪᑦ ᖄᖏᕐᓂᑯᓕᐅᕐᑎᐅᒐᑎᒃ ᑲᑐᑦᔨᖃᑎᒌᓐᓂᐅᓱᑎᒃ ᐊᓪᓚᓯᒪᔪᕐᑎᒍᑦ 5-ᒥ ᓄᓇᐅᑉ ᐃᓂᓪᓚᑕᐅᓯᒪᒍᑎᖓᑕ ᐱᖁᔭᖓᓂ, ᐊᐅᓚᑕᐅᒍᑎᓖᑦ ᑖᑦᓱᒥᖓ ᐱᖁᔭᕐᒥᒃ, ᔦᒻᔅ ᐯ ᑯᐯᑉ ᑕᕐᕋᖓᑕ ᐊᖏᖃᑎᒌᓐᓂᖓᓂᒃ ᐊᒻᒪᓗ ᑯᐯᒻᒥ ᑲᒻᐸᓃᑦ ᐱᖁᔭᖓᓂᒃ.

ᓄᓇᒥᒃ ᑎᒍᒥᐊᕐᑏᑦ ᐃᓚᐅᔪᖁᑎᖏᑦ ᐊᖏᖃᑎᒌᓐᓂᒧᑦ ᐃᓚᐅᔪᐃᑦ ᐱᑐᑦᓯᒪᕕᖃᕐᓱᑎᒃ ᓄᓇᓕᒋᔭᒥᓂᒃ. ᑖᒃᑯᐊ ᑎᒦᐅᔪᑦ ᐃᓄᑐᐃᓐᓇᓅᓕᖓᑦᓱᑎᒃ ᓄᓇᓕᐅᑉ ᐅᓇᒻᒥᓲᑎᖏᓐᓂᒃ ᑭᒡᒐᑐᕈᑎᖃᕐᓱᑎᒃ.

ᓄᓇᒥᒃ ᑎᒍᒥᐊᕐᑏᑦ ᐃᓂᓪᓚᑕᐅᓯᒪᒍᑎᖏᑦ ᐊᐅᓚᑕᐅᒍᑎᖃᕐᑐᑦ ᐱᖁᔮᐱᓐᓂᒃ ᐊᖏᕐᐅᓯᒪᔪᓂᒃ ᐃᓚᐅᔪᓄᑦ ᓄᓇᒥᒃ ᑎᒍᒥᐊᕐᑎᓄᑦ. ᑕᒡᒎᓇ ᓄᐃᑦᓯᒍᓐᓇᑐᑦ ᑲᑎᒪᔨᓂᒃ ᐱᖓᓲᒍᓐᓇᑐᓂᒃ ᖁᓕᓪᓗ ᒪᕐᕈᓘᓗᑎᓪᓘᓃᑦ (ᓄᓇᐅᑉ ᖃᓄᐃᓕᖓᒍᒪᓂᖓ ᒪᓕᓪᓗᖑ) ᓂᕈᐊᕐᑕᐅᓯᒪᒍᓐᓇᑐᓂᒃ ᒪᕐᕉᓄᑦ ᐊᕐᕌᒎᓐᓄᑦ, ᑖᒃᑯᓇᓂ ᑲᑎᒪᔨᓂ, ᐳᕐᑐᓂᓭᑦ ᐃᓂᓕᐅᕐᑕᐅᒪᓲᑦ ᐊᖓᔪᕐᖄᒥᒃ, ᑐᖓᓕᖓᓂᒃ, ᐊᓪᓚᑎᒥᒃ ᑮᓇᐅᔭᓕᕆᔨᒥᓪᓗ ᑕᒡᒐᓂ ᑎᒥᒥ.

ᑲᑎᒪᔩᑦ ᐃᓗᓐᓈᒍᑦ ᐊᐅᓚᑦᓯᓂᕐᒥᒃ ᓄᑭᓖᑦ, ᓄᑭᖃᕐᓱᑎᒃ ᐱᓇᓱᑦᑎᑖᕈᓐᓇᓂᕐᒥᒃ, ᐱᖁᔮᐱᓕᐅᕈᓐᓇᓂᕐᒥᒃ, ᐱᓇᓱᐊᖃᑎᒌᒍᑎᐅᓂᐊᕐᑐᓂᒃ ᐊᑎᓕᐅᕐᕕᖃᕈᓐᓇᓂᕐᒥᒃ, ᑮᓇᐅᔦᑦ ᐊᑐᕐᑕᐅᓂᖏᓐᓅᓕᖓᔪᓂᒃ, ᐊᓯᖏᓐᓂᓗ, ᐃᑉᐱᒋᔭᖃᑦᓯᐊᒥᑦᓱᑎᓪᓗ ᐃᓗᓐᓈᒍᑦ ᑎᓕᔭᐅᒪᐅᑎᒥᓂᒃ, ᐱᕙᓪᓕᑎᑦᓯᒐᓱᐊᕐᑎᐅᓂᕐᒥᒃ ᓄᓇᓕᒥᓂᒃ.

ᐱᓇᓱᐊᕋᑦᓴᕆᓂᕐᐹᖏᑦ ᓄᑭᖏᓪᓗ ᐱᓯᒪᔪᑦ ᓄᓇᐅᑉ ᐃᓂᓪᓚᑕᐅᓯᒪᒍᑎᖓᑕ ᐱᖁᔭᖓᓂᑦ ᐱᑦᔪᑎᐅᑎᓪᓗᒋᑦ ᐅᒪᔪᕐᓯᐅᓂᕐᒨᓕᖓᔪᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᑕ ᓄᓇᖁᑎᖏᓐᓂ ᐊᒻᒪᓗ ᐊᓪᓚᑕᐅᓯᒪᕕᖓᓂ 3-ᒥ ᑖᑦᓱᒪ ᐊᖏᖃᑎᒌᓐᓂᐅᑉ ᐱᑦᔪᑎᐅᑎᓪᓗᒋᑦ ᐃᓚᐅᔪᐃᑦ ᑖᑦᓱᒧᖓ ᐊᖏᖃᑎᒌᓐᓂᒧᑦ. ᐃᓚᖃᕐᒥᔪᖅ, ᑕᒪᒃᑯᐊ ᐊᕙᑎᓕᕆᓂᕐᒧᑦ ᐱᖁᔦᑦ ᐱᕕᖃᕐᑎᓯᒻᒥᒪᑕ ᓄᓇᒥᒃ ᑎᒍᒥᐊᕐᑎᓂᒃ ᓂᑦᔮᕈᓐᓇᕕᖃᕐᑎᓯᑦᓱᑎᒃ ᕿᒥᕐᕈᔨᐅᔪᓄᑦ ᓴᕐᕿᑕᐅᓯᒪᔪᓄᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ.

ᐃᓚᐅᒍᓐᓇᕕᖃᕐᑐᑦ ᖃᖏᕐᓂᑯᓕᐅᕋᓱᐊᕐᓂᑯᑦ ᐱᓇᓱᐊᕋᑦᓴᓂ ᑎᒥᖁᑎᓕᐅᕐᓂᑯᑦ, ᐊᓯᐊᓂᐊᓪᓛᑦ ᑎᒥᐅᖃᑎᒥᓂᒃ, ᓄᓇᒥᒃ ᑎᒍᒥᐊᕐᑎᐅᖃᑎᒥᓂᒃ ᐃᒻᒥᓂᕿᔪᓂᐊᓪᓛᑦ ᐱᓇᓱᐊᖃᑎᖃᕐᓗᑎᒃ,

ᓄᓇᓕᐅᑉ ᓄᓇᒥᒃ ᑎᒍᒥᐊᕐᑎᖏᑦ ᑲᒪᒋᔭᖃᕐᒥᔪᑦ ᓄᑕᐅᓯᑎᕆᔨᐅᑦᓱᑎᒃ ᓄᓇᓕᒥᓂ ᐃᓚᐅᔪᐃᑦ ᐊᓪᓚᑕᐅᓯᒪᐅᑎᖏᓐᓂᒃ, ᑖᒃᑯᐊᓗ ᖃᑦᓯᐅᓂᖏᑦ ᐃᑉᐱᒋᑦᓱᒋᑦ ᑮᓇᐅᔦᑦ ᐊᒡᒍᑕᐅᓯᕙᑦᑐᑦ ᒪᙯᑦᑏᑦ ᓴᐳᒻᒥᔭᐅᒍᑎᖏᑎᒍᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᒍᑦ ᓴᕐᕿᑕᐅᒪᔪᕐᑎᒍᑦ.

ᑲᑎᒪᔩᑦ
Annie Munick
Tommy Nayome
Willie Cain (President)
Johnny Cain (Vice-President)
Peter Argnatuk (Secretary)
(Treasurer)
ᑲᒪᔨᒻᒪᕆ
NameChesley Mesher
Emailarqivik.lhc@gmail.com
ᖃᐅᔨᓂᐊᕐᕕᓭᑦ
LHC PO BOX52
Postal CodeJ0M 1T0
Phone819-633-5490
Fax819-633-5491
ᑎᒥᖁᑎᖏᑦ
SubsidiaryIqaluppik Hotel
DescriptionHotel Accomodations 2 stars
AddressPO BOX 52, Bldg 60, Tasiujaq, QC, J0M 1T0
PhoneTel.: 819 633 5414, Fax: 819 633 5344
ContactVaijula S. Cain
Emailiqaluppikhotel@gmail.com

ᑐᓴᕋᑦᓭᑦ ᓱᓇᓱᐊᕐᓂᐅᓚᖓᔪᓪᓗ

ᓄᓇᓕᐅᑉ ᖃᓄᐃᓕᖓᖁᔨᒍᑎᖏᑦ