ᐅᔭᕋᓐᓂᐊᓂᖅ ᐅᔭᕋᓐᓂᐊᕋᑦᓴᓯᐅᕐᓂᓗ

ᐱᔪᓐᓇᐅᑏᑦ ᓄᑮᒋᔭᐅᔪᓪᓗ ᑳᑕᑰᔨ 1 ᓄᓇᖁᑎᖏᓐᓂ

ᐅᔭᕋᓐᓂᐊᕋᑦᓴᔦᑦ ᐱᔪᓐᓇᐅᑎᖃᕐᕕᐅᓂᖓ

ᓄᓇᐅᑉ ᐃᓂᓪᓚᑕᐅᓯᒪᒍᑎᖓ ᔦᒻᔅ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓗ ᐅᖃᐅᓯᕐᑕᖃᕐᖁᑦ, ᑐᖕᖓᕕᐅᔪᒥᒃ, ᑕᒪᒃᑯᐊ ᐅᔭᕋᓐᓂᐊᕋᑦᓴᔦᑦ ᐱᔪᓐᓇᐅᑎᖃᕐᕕᐅᓂᖓ ᓄᓇᐅᓪᓗ ᐃᑭᐊᖓᓃᑦᑐᑦ ᐱᔪᓐᓇᐅᑎᖃᕐᕕᐅᓂᖓ ᓇᒻᒥᓂᕆᔭᐅᓂᕋᕐᓱᒋᑦ ᑯᐯᑉ ᑲᕙᒪᖓᓄᑦ. ᑌᒣᒻᒪᑕᒐ, ᑯᐯᒃ ᓇᒻᒥᓂᖃᕐᐳᖅ ᐅᔭᕋᓐᓂᐊᕋᑦᓴᔭᓕᒫᓄᑦ ᓄᓇᐅᓪᓗ ᐃᑭᐊᖓᓃᑦᑐᓄᑦ ᐱᔪᓐᓇᐅᑎᓂᒃ ᑖᒃᑯᓇᓂ ᑳᑕᑰᔨ 1 ᓄᓇᖁᑎᖏᓐᓂ, ᓄᓇᒥᒃ ᑎᒍᒥᐊᕐᑎᑰᖕᖏᑐᖅ.

ᑖᓐᓇ ᒪᓕᒐᖅ ᐊᑕᐅᓯᕐᒥᒃ ᐱᒋᔭᐅᓂᕃᔪᒐᓗᐊᖅ ᓄᓇᒦᑦᑐᒥ, ᖁᓪᓕᓴᔭᕐᒥᒃ ᐊᓯᖏᓐᓂᓗ ᑌᒣᑦᑐᓴᔭᓂᒃ ᐊᑐᕐᑕᐅᓲᓂᒃ ᓴᓇᖕᖑᐊᒐᓕᐊᖑᑦᓱᑎᒃ. ᖁᓪᓕᓴᔭᖅ ᐊᓯᖏᓪᓗ ᑌᓭᒣᑦᑐᓴᔦᑦ ᑳᑕᑰᔨ 1 ᓄᓇᖁᑎᖏᓐᓃᑐᑦ ᓇᒻᒥᓂᕆᔭᐅᓪᓚᕆᑦᑐᑦ ᐊᑐᓂ ᓄᓇᒥᒃ ᑎᒍᒥᐊᕐᑎᐅᔪᓄᑦ.

ᐊᑐᐊᕐᓯᒋᐊᓪᓛᕆᑦ

ᑭᓯᐊᓂᑦᑕᐅᒃ ᑐᑭᓯᒪᔭᐅᒋᐊᖃᕐᒥᔪᖅ ᑕᒪᒃᑯᐊ ᐅᔭᕋᓐᓂᐊᕈᓐᓇᓃᑦ ᑲᔪᓯᑐᐃᓐᓇᖃᔭᖕᖏᑑᒋᐊᖏᑦ ᑳᑕᑰᔨ 1 ᓄᓇᖁᑎᖏᓐᓂ ᐊᖏᕐᑕᐅᓯᒪᑦᓯᐊᖄᕋᑎᒃ ᑖᒃᑯᓄᖓ ᓱᕐᕋᑕᐅᓚᖓᔪᓄᑦ ᓄᓇᒥᒃ ᑎᒍᒥᐊᕐᑎᓄᑦ. ᑕᒐᓪᓛᑦ, ᐊᓪᓚᓯᒪᔪᖅ 145 ᓄᓇᐅᑉ ᐃᓂᓪᓚᑕᐅᓯᒪᒍᑎᖓᑕ ᐱᖁᔭᖓᓂ ᐅᖃᕐᓯᒪᑦᓯᐊᑐᖅ ᐅᔭᕋᓐᓂᐊᑐᖃᕐᖃᔭᖏᒋᐊᖓᓂᒃ ᑳᑕᑰᔨ 1 ᓄᓇᖁᖏᓐᓂ ᐊᖏᕐᖄᑎᓐᓇᒋᑦ ᑖᒃᑯᐊ ᓄᓇᒥᒃ ᑎᒍᒥᐊᕐᑏᑦ ᐊᒻᒪᓗ ᐊᑭᓕᕐᑕᐅᒍᑎᖄᕐᖄᑎᓐᓇᒋᑦ ᑕᒪᑦᓱᒪ ᑳᑕᑰᔨ 1 ᓄᓇᖁᑎᖏᑦᑕ ᐊᑐᕐᑕᐅᓂᖓᓄᑦ.

ᐊᒻᒪᓗᑦᑕᐅᒃ, ᐱᒻᒪᕆᐅᒻᒥᔪᖅ ᓇᓗᓀᕐᑕᐅᓯᒪᑦᓯᐊᓂᖓ ᑐᐊᐸᔮᑉ ᐊᑐᕐᑕᐅᓂᖓ (ᐃᓪᓗᓕᐅᕐᑎᓄᑦ ᓴᓇᔪᓄᓪᓗ) ᐅᔭᕋᓐᓂᐊᕋᑦᓴᔭᐅᓂᕋᕐᑕᐅᓱᓂ ᐱᔪᓐᓇᐅᑎᖃᕈᑎᐅᒻᒪᑦ. ᑕᒐᓪᓛᑦ, ᑕᒪᓐᓇ ᑐᐊᐸᔮᖅ ᐅᔭᕋᓐᓂᐊᕋᑦᓴᔭᐅᑦᓱᓂ ᑎᒍᓚᔭᐅᓂᕐᐸᐅᓲᖅ ᑳᑕᑰᔨ 1 ᓄᓇᖁᑎᖏᓐᓂ. ᑌᒣᒻᒪᑦ ᐃᓂᓪᓚᖓᑦᓯᐊᑐᒥᒃ ᐊᓪᓚᓯᒪᑦᓯᐊᑐᒥᒃ ᐊᖏᕐᓂᖃᕐᖄᕆᐊᖃᓲᑦ ᓄᓇᒥᒃ ᑎᒍᒥᐊᕐᑏᑦ ᑐᐊᐸᔮᖅ ᐊᑐᕐᑕᐅᓚᖓᑉᐸᑦ ᑐᐊᐸᔮᕐᑕᕕᐅᓂᐊᕐᑐᒥᓪᓗ ᐊᐅᓚᑦᓯᔪᖃᓚᖓᑐᐊᕐᐸᑦ. ᑖᒃᑯᐊ ᓄᓇᒥᒃ ᑎᒍᒥᐊᕐᑏᑦ ᐊᖏᖃᑎᒌᒐᓱᐊᕈᑎᖃᕈᓐᓇᓯᐊᕐᑐᑦ ᐊᑭᓕᕐᑐᑕᐅᒍᑎᒋᓂᐊᕐᑕᒥᓂᒃ ᑐᐊᐸᔮᕐᑕᕕᓕᐅᕐᑐᖃᕐᓂᐊᑐᐊᕐᐸᑦ ᑳᑕᑰᔨ 1 ᓄᓇᖁᑎᖏᓐᓂ.

ᐱᔪᓐᓇᐅᑏᑦ ᓄᑮᒋᔭᐅᔪᓪᓗ ᑳᑕᑰᔨ 2 ᓄᓇᖁᑎᖏᓐᓂ

ᐱᑦᓴᔭᓄᐊᖓᔪᓂᒃ ᐱᓇᓱᐊᕐᓃᑦ

ᓄᓇᐅᑉ ᐃᓂᓪᓚᑕᐅᓯᒪᒍᑎᖓ ᐊᓪᓚᑕᐅᓯᒪᔪᐃᓪᓗ ᓵᑉᑕ 7-ᒥ ᔦᒻᔅ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓂ ᑐᑭᓯᓇᕐᑎᓯᒋᐊᓪᓚᒍᑎᐅᒋᕗᑦ ᐱᓇᓱᐊᕐᓂᐅᔪᓂᒃ ᐱᑦᓴᔭᓄᐊᖓᑦᓱᑎᒃ. ᓄᓇᒥᒃ ᑎᒍᒥᐊᕐᑏᑦ ᓱᕐᕋᑕᐅᓚᖓᒍᑎᒃ ᑐᑭᓯᓴᕐᕕᐅᖄᕆᐊᓖᑦ ᐱᓇᓱᐊᕐᑐᖃᓚᐅᕐᑎᓇᒍ ᑳᑕᑰᔨ 2 ᓄᓇᖁᑎᖏᓐᓂ, ᐅᖃᕐᓯᒪᔪᕐᑕᖃᕐᓱᓂᓗ ᐱᓇᓱᐊᕐᓂᐅᓂᐊᕐᓂᕋᕐᑕᖅ ᐅᒃᑯᐃᓯᒐᔭᕆᐊᖓ ᓄᐃᑦᓯᒍᑎᐅᓗᓂ ᐊᑭᓕᕐᑐᑕᐅᒋᐊᖃᕐᓂᒥᒃ ᐅᕝᕙᓗᓐᓃᑦ ᓄᓇᐅᑉ ᑕᐅᕐᓯᑕᐅᔪᑦᓴᐅᓂᖓᓂᒃ.

ᑐᑭᓯᒋᐊᕐᕕᓭᑦ ᖃᕆᑕᐅᔭᒃᑯᑦ