ᓴᓇᓂᖅ ᓄᓇᕕᒻᒥ

ᓴᓇᓂᖅ ᑳᑕᑰᔨ 1 ᓄᓇᖁᑎᖏᓐᓂ

ᓄᓇᕕᐅᑉ ᓄᓇᒥᒃ ᑎᒍᒥᐊᕐᑎᖏᑦ (ᒫᓐᓇᒥᑦ ᑌᔭᐅᒍᓯᖃᕐᓂᐊᑐᑦ “ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᑦ) ᓇᒻᒥᓂᖃᕐᖁᑦ ᐊᑐᓂ ᓄᓇᖁᑎᒥᓂᒃ ᑳᑕᑰᔨ 1-ᒦᑦᑐᓂᒃ ᒪᓕᑦᓱᒍ ᐊᓪᓚᓯᒪᔪᖅ 7 ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓂ (ᒫᓐᓇᒥᑦ ᑌᔭᐅᒍᓯᖃᕐᓂᐊᑐᖅ “ᓄᓇᐅᑉ ᐃᓂᓪᓚᑕᐅᒪᒍᓯᖓ”) ᐊᒻᒪᓗ ᐱᖁᔭᕐ ᐃᓕᖓᔪᖅ ᓄᓇᐅᑉ ᐃᓂᓪᓚᑕᐅᒪᒍᓯᖓᓄᑦ ᔦᒻᔅ ᐯᒥ ᑯᐯᒻᒥᓗ ᓄᓇᖁᑎᑖᕐᖃᒥᐅᔪᓂ (RSQ,c.R.13-1)(ᒫᓐᓇᒥᑦ ᑌᔭᐅᒍᓯᖃᕐᓂᐊᑐᖅ “ᐱᖁᔭ”).

ᑐᕌᒐᖏᑦ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ, ᐊᓯᖃᕋᓗᐊᕐᒥᓱᑎᒃ ᐱᓇᓱᐊᕋᑦᓴᕆᒻᒥᔭᖏᓐᓂᒃ, ᐊᐅᓚᑦᓯᔨᐅᓂᕐᒨᓕᖓᕗᑦ ᓄᓇᕕᐅᑉ ᑳᑕᑰᔨ 1-ᒥ ᓄᓇᖁᑎᐅᔪᓂᒃ ᑭᒡᒐᑐᕐᓗᒋᑦ ᐱᕙᓪᓕᖁᑎᖃᕐᑎᓗᒋᓪᓗ ᐃᓗᓐᓇᑎᒃ ᔦᒥᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ ᐃᓄᐃᑦ ᐃᓚᐅᔪᐃᑦ, ᑫᓪᓗᑐᐃᓂᒃᑯᑦ ᐃᓗᕐᖁᓯᕐᒥᒃ, ᐊᕙᑎᖓᓂᒃ ᐃᓅᓯᒃᑯᓗ ᖃᓄᐃᖕᖏᓯᐊᕆᐊᖃᕐᓂᖓᓂᒃ ᑕᒪᒃᑯᐊ ᐃᓄᐃᑦ ᐃᓚᐅᔪᑦ. ᑌᒣᒻᒪᑦ ᓄᓇᓕᐅᑉ ᓄᓇᕕᒻᒥ ᑎᒍᒥᐊᕐᑎᖏᑦ ᓇᒻᒥᓂᖃᕐᑑᓂᒃᑯᑦ ᓄᓇᒥᒃ ᑲᒪᒋᔭᖃᕆᐊᖃᕐᖁᑦ ᓇᓗᓀᕐᓯᓂᕐᒥᒃ ᐊᒡᒍᑐᐃᓂᕐᒥᓗ ᐱᔪᓐᓇᐅᑎᖃᕐᑎᓯᓂᕐᒥᒃ ᐊᑐᕐᑕᐅᓂᖓᓄᑦ ᓄᓇᓯᒪᕕᐅᓂᖓᓄᓪᓗ ᑕᒪᒃᑯᐊ ᑳᑕᑰᔨ 1 ᓄᓀᑦ.

ᐊᑐᐊᕐᓯᒋᐊᓪᓛᕆᑦ

ᐊᓪᓚᓯᒪᔪᑦ 145 ᐱᖁᔭᕐᒥ ᒪᓕᑦᓱᒍ, ᐅᔭᕋᓐᓂᐊᕋᑦᓴᔭᖅ ᐅᕝᕙᓗᓐᓃᑦ ᐊᓯᖏᑦ ᓄᓇᐅᑉ ᐃᑭᐊᖓᓃᑐᑦ ᐱᔪᓐᓇᐅᑎᖃᕈᑏᑦ ᐱᔭᐅᕐᖃᔭᖕᖏᓚᑦ, ᑎᒍᓚᔭᐅᕐᖃᔭᕋᑎᒃ, ᐅᔭᕋᓐᓂᐊᑕᐅᕐᖃᔭᕋᑎᒃ ᐱᓇᓱᐊᕈᑕᐅᕐᖃᔭᕋᑎᓪᓗ ᑖᒃᑯᓇᖕᖓᑦ ᓄᓇᕕᐅᑉ ᑳᑕᑰᔨ 1 ᓄᓇᖁᑎᖏᓐᓂᑦ ᐊᖏᕐᑕᐅᓯᒪᕐᖄᕋᑎᒃ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᓐᓄᑦ, ᐊᑭᓕᕐᑕᐅᒍᑎᐅᒋᐊᖃᕐᓱᑎᓪᓗ ᐊᖏᕈᑕᐅᓯᒪᓕᑐᐊᕐᐸᑦ ᐊᑐᕐᑕᐅᓂᑦᓴᖓ ᐱᔪᓐᓇᐅᑏᑦ ᐃᓕᖓᔪᑦ ᑕᒪᒃᑯᓄᖓ ᓄᓇᓄᑦ.

ᓄᓇᐅᑉ ᐃᓂᓪᓚᑕᐅᒪᒍᓯᖓ ᐱᖁᔭᕐᓗ ᐃᓕᖓᓪᓚᕆᑦᓯᐊᖁᖅ ᐃᓗᓐᓀᓄᑦ ᐱᓇᓱᐊᕐᕕᐅᔪᓄᑦ, ᐃᒻᒥᓂᕿᔫᒐᓗᐊᕐᐸᑕ ᐅᕝᕙᓗᓐᓃᑦ ᑲᕙᒪᑐᖃᒃᑰᓅᓕᖓᒐᓗᐊᕐᐸᑕ, ᑯᐯᒻᒨᓕᖓᒐᓗᐊᕐᐸᑕ, ᓄᓇᖁᑎᒋᔭᐅᔪᒨᓕᖓᒐᓗᐊᕐᐸᑕ ᓄᓇᓕᒻᒨᓕᖓᒐᓗᐊᕐᐸᑕᓗ, ᑎᒥᖁᑎᖏᓐᓄᑦ ᐱᓇᓱᕝᕕᖁᑎᖏᓐᓄᓗ.

ᐊᑐᕐᑕᐅᓂᖓ ᓄᓇᖃᕐᕕᐅᓂᖓᓗ ᓄᓇᕕᐅᑉ ᑳᑕᑰᔨ 1 ᓄᓇᖏᑦᑕ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᓐᓄᑦ ᐱᔪᓐᓇᐅᑎᖃᕐᑎᑕᐅᕐᖄᕆᐊᖃᕐᖁᑦ ᐊᒻᒪᓗ/ᐅᕝᕙᓗᓐᓃᑦ ᐊᖏᕐᑕᐅᓚᕆᑦᓯᒪᑦᓯᐊᓗᑎᒃ ᑲᔪᓯᒋᐊᓚᐅᕐᑎᓇᒍ ᐊᑐᕐᑕᐅᓂᖓ ᓄᓇᖃᕐᕕᐅᓂᖓᓗ. ᐊᖏᕐᑕᐅᓯᒪᖕᖏᓗᑎᒃ ᐊᑐᕐᑐᑦ ᓄᓇᑦᑐᓗᓐᓃᑦ ᓄᓇᕕᐅᑉ ᑳᑕᑰᔨ 1 ᓄᓇᖏᓐᓂ, ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᓐᓄᑦ ᓄᕐᖃᑎᑕᐅᒍᓐᓇᖁᑦ ᐱᓇᓱᐊᕐᑕᖏᑦ ᐊᒻᒪᓗ/ᐅᕝᕙᓗᓐᓃᑦ ᐱᓇᓱᐊᓕᕇᕐᑕᖏᑦ ᐲᔭᕐᑕᐅᓗᑎᒃ ᐊᒻᒪᓗ/ᐅᕝᕙᓗᓐᓃᑦ ᐱᖁᔭᕐᑎᒍᑦ ᓵᑕᐅᒍᑎᖃᕈᓐᓇᓱᑎᒃ. ᑌᒣᒻᒪᑦ ᐱᓇᓱᐊᕋᓱᐊᕈᒪᔪᑦ ᐱᕙᓪᓕᐊᕋᓱᐊᕈᒪᔪᓪᓗ ᐱᓇᓱᐊᖃᑕᐅᑦᓯᐊᕋᓱᐊᕐᓂᖓᑦ ᐱᒻᒪᕆᐊᓘᕗᖅ.

ᓄᓇᕕᓕᒫᒧᐊᖓᔪᑦ, ᐱᓇᓱᐊᒻᒪᕆᓂᐅᑎᑕᐅᒐᓱᐊᕐᐸᓂᐊᕐᑐᑦ ᐱᓪᓗᒋᑦ, ᐱᓇᓱᐊᕈᒪᐅᑎᓕᐅᕐᓂᖃᓚᐅᕐᑎᓇᒍ ᑲᑎᒪᑦᓯᖄᖃᑦᑕᓂᖅ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖓᓂᒃ ᐊᑑᑎᕐᖄᖃᑦᑕᖁᔭᐅᓪᓚᕆᑦᑐᑦ. ᐊᒻᒪᓗᐊᓪᓛᑦ, ᐃᑉᐱᒋᓗᒍ ᐱᓇᓱᐊᕐᑕᐅᒍᒪᔫᑉ ᓱᓇᐅᓂᖓ, ᐊᓯᖏᑦ ᑎᒦᑦ ᑐᑭᓯᓴᕐᑕᐅᖄᖃᑦᑕᕆᐊᖃᕈᓇᐅᒻᒥᔪᑦ (ᐊᓪᓚᓯᒪᔪᖅ 7.1.14 ᔦᒥᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓂ).

ᑕᒐ, ᐅᑯᐊ ᑐᑭᓯᑎᑦᓯᒍᑏᑦ ᓄᐃᑕᑎᑦᓯᕗᑦ ᖃᓄᐃᓕᖓᔪᒥᒃ ᐊᑐᐃᓐᓇᕈᕐᑎᑐᖃᕆᐊᖃᕐᒪᖔᑦ ᑐᑦᓯᕋᐅᑎᓕᐅᕈᓐᓇᑐᖃᕐᒪᖔᓪᓗ ᓄᓇᒥᒃ ᑎᒍᒥᐊᕐᑎᑯᑦ ᐱᔪᓐᓇᐅᑎᖃᕐᑎᓯᒍᑎᖓᓂᒃ, ᑕᒪᒃᑯᓄᖓ ᐱᓇᓱᐊᒻᒪᕆᓂᐅᑎᑕᐅᒐᓱᐊᕐᐸᓂᐊᕐᑐᓄᑦ ᓄᓇᕕᐅᑉ ᑳᑕᑰᔨ 1 ᓄᓇᖁᑎᖏᓐᓂ.

ᑐᑦᓯᕋᐅᑏᑦ ᐱᔪᓐᓇᐅᑏᖃᕐᑎᓯᒍᑏᓪᓗ ᓴᕐᕿᑕᐅᓯᒪᔪᑦ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᓄᑦ ᐊᒻᒪᓗ ᓄᓇᕕᐅᑉ ᓄᓇᒥᒃ ᑎᒍᒥᐊᕐᑎᖏᓐᓄᑦ ᐃᑲᔪᕐᓯᒪᒐᓱᐊᕈᑎᐅᑦᓱᑎᒃ ᐱᓇᓱᐊᕈᒪᒐᔭᕐᑐᓂᒃ ᐱᕙᓪᓕᐊᑎᑦᓯᒍᒪᒐᔭᕐᑐᓂᓪᓗ ᓇᓗᓀᕐᓯᒍᓐᓇᓯᐊᖁᓪᓗᒋᑦ ᑐᑭᓯᒪᑦᓯᐊᖁᓪᓗᒋᓪᓗ ᐊᑦᔨᒌᖕᖏᑐᓂᒃ ᒪᓕᒐᐅᔪᓂᒃ ᖃᓄᐃᓕᖓᐅᑎᐅᒋᐊᓕᓐᓂᓗ ᐊᑐᕐᑕᐅᓂᑦᓴᖓᓄᑦ ᓄᓇᖃᕐᕕᐅᒍᒪᓂᖓᓄᓪᓗ ᓄᓇᕕᐅᑉ ᑳᑕᑰᔨ 1-ᒥ ᓄᓀᑦ ᐊᒻᒪᓗ ᑐᑭᓯᓇᕐᑎᓯᑦᓯᐊᕈᓐᓇᓱᑎᒃ ᐊᑐᓂ ᖃᓄᐃᓘᖃᑎᒌᑦᑐᑦ ᐃᓱᒪᓘᑎᒋᒋᐊᓕᖏᓐᓂᒃ ᑲᔪᓯᑎᒋᐊᖃᕐᑕᖏᓐᓂᓗ.

ᑐᑦᓯᕋᐅᑏᑦ ᑕᑕᕐᓴᒐᑦᓴᔦᑦ ᑐᓂᔭᐅᖃᑦᑕᕆᐊᓖᑦ ᑐᕃᓐᓇᑎᑕᐅᓗᑎᒃ ᑖᒃᑯᓄᖓ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᓐᓄᑦ ᐱᓇᓱᐊᕐᕕᐅᒐᓱᐊᕈᒪᔪᓄᑦ. ᑖᒃᑯᐊ ᑕᑕᕐᓴᒐᑦᓴᔦᑦ ᐱᔭᐅᒍᓐᓇᑐᑦ ᑖᒃᑯᓇᖕᖓᑦ ᓄᓇᓕᐅᑉ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᖏᓐᓂᑦ ᐊᑐᐃᓐᓇᐅᒥᑦᓱᑎᓪᓗ ᖃᕆᑕᐅᔭᕐᑎᒍᑦ ᓄᓇᒥᒃ ᑎᒍᒥᐊᕐᑏᑦ ᑐᑭᓯᓴᕐᑕᐅᕕᖏᓐᓂ ᓄᓇᕕᐅᑉ ᓄᓇᒥᒃ ᑎᒍᒥᐊᕐᑎᑯᖏᑦᑕ ᑕᑯᒋᐊᕐᑕᐅᕕᖏᓐᓂ.

ᑐᑭᓯᒋᐊᕐᕕᓭᑦ ᖃᕆᑕᐅᔭᒃᑯᑦ