ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓᑕ ᒥᑦᓵᓄᐊᖓᔪᑦ

ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓ (NLHCA) ᓴᕐᕿᑕᐅᓚᐅᕐᓯᒪᔪᖅ ᒣ 17, 2002-ᖑᑎᓪᓗᒍ, ᖄᖏᕐᓂᑯᓕᐅᕐᑎᐅᒐᓂ ᑎᒥᐅᔪᖅ ᑭᒡᒐᑐᕐᓱᓂ ᓄᓇᒥᒃ ᑎᒍᒥᐊᕐᑎᓕᒫᑦᓯᐊᓂᒃ ᓄᓇᕕᒻᒥ.

ᑲᑐᑦᔨᖃᑎᒌᓐᓂᐅᑉ ᑎᓕᔭᐅᒪᐅᑎᖓ, ᐊᒥᓲᒐᓗᐊᕐᑎᓗᒋᑦ, ᐊᑕᐅᓯᖕᖑᑎᑦᓯᕕᐅᔪᖅ ᓄᓇᒥᒃ ᑎᑦᒍᒥᐊᕐᑎᓂᒃ ᐱᕕᖃᕈᓐᓇᖁᓪᓗᒋᑦ ᓄᐃᑕᑎᑦᓯᒐᓱᐊᕐᓂᒥᒃ ᑭᒡᒐᑐᕐᓂᒥᓪᓗ ᐅᓇᒻᒥᓲᑎᒥᓂᒃ ᐃᓱᒫᓘᑎᒥᓂᓪᓗ ᐃᓚᖃᕐᓗᑎᒃ ᐊᑦᔨᒌᖕᖏᑐᓂᒃ ᐱᓇᓱᐊᕐᕕᐅᒥᔪᓂᒃ ᐱᑦᔪᑎᒋᓗᒋᑦ ᐊᐱᕆᐅᑎᐅᒍᓐᓇᑐᑦ ᐃᓕᖓᔪᑦ ᐱᒻᒪᕆᐅᔪᓄᑦ ᑲᒪᒋᔭᑦᓴᔭᕆᔭᒥᓄᑦ ᐱᓇᓱᐊᕋᑦᓴᔭᕆᔭᒥᓄᓪᓗ ᓄᐃᑕᐅᒪᔪᓄᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ (JBNQA) ᐊᒻᒪᓗ ᐊᑦᔨᒌᖕᖏᑐᓄᑦ ᑯᐯᑉ ᐱᖁᔭᓕᐊᕆᓯᒪᔭᖏᓐᓄᑦ, ᐱᓗᐊᕐᑐᒥᒃ:

  • ᓯᕗᓕᕐᑎᐅᑎᑕᐅᑦᓱᓂ ᖃᓄᐃᓘᕈᑕᐅᓂᖓᓄᑦ ᐊᐅᓚᑕᐅᓂᖓᑕ, ᖃᐅᔨᒪᔭᐅᑎᑕᐅᒐᓱᐊᕐᓂᖓᑕ ᓴᐳᒻᒥᔭᐅᓂᖓᑕᓗ ᐊᑐᕐᑕᐅᒍᓯᖏᑦᑕ ᓄᓇᖃᕐᕕᐅᓂᖏᑦᑕᓗ ᑳᑕᑰᔨ 1 2-ᓗ ᓄᓀᑦ, ᑕᒪᒃᑯᓄᖓ ᐊᑦᔨᒌᖕᖏᑐᓄᑦ ᓄᓇᒥᒃ ᐊᑐᕐᐸᑐᓄᑦ, ᑕᒪᓐᓇᓕᒫᕐᓗ ᒪᓕᑦᓱᓂ ᐱᔪᓐᓇᐅᑎᖃᕐᑎᑕᐅᒍᑎᓂᒃ ᑲᒪᒋᔭᖃᕐᑎᑕᐅᒍᑎᓂᓪᓗ ᓄᐃᑕᐅᒪᔪᓂᒃ ᐱᖁᔭᕐᒧᑦ ᐃᓕᖓᔪᒧᑦ ᓄᓇᐅᑉ ᐃᓂᓪᓚᑕᐅᓯᒪᒍᑎᖓᓄᑦ ᔦᒻᔅ ᐯᒥ ᑯᐯᒻᒥᓗ ᓄᓇᖁᑎᕐᑖᖃᒥᐅᔪᓂ (Q.R.S., ch.R-13.1);
  • ᓯᕗᓕᕐᑎᐅᑎᑕᐅᑦᓱᓂ ᖃᓄᐃᓘᕈᑕᐅᓂᖓᓄᑦ ᐊᐅᓚᑕᐅᓂᖓᑕ, ᖃᐅᔨᒪᔭᐅᑎᑕᐅᒐᓱᐊᕐᓂᖓᑕ ᓴᐳᒻᒥᔭᐅᓂᖓᑕᓗ ᐊᑐᕐᑕᐅᒍᓯᖏᑦᑕ ᓄᓇᖃᕐᕕᐅᓂᖏᑦᑕᓗ ᑳᑕᑰᔨ 1 2-ᓗ ᓄᓀᑦ ᐅᒪᔪᕐᓯᐅᓂᕐᒧᑦ, ᐃᖃᓗᑦᓯᐅᓂᕐᒧᓗ ᒥᑭᒋᐊᕐᓂᐊᓂᕐᒧᓗ, ᐅᔭᕋᓐᓂᐊᕋᑦᓴᓯᐅᕐᓂᒧᓪᓗ, ᐊᕙᑎᓕᕆᓂᕐᒧᑦ, ᐃᓅᓯᕐᑎᒍᑦ ᑮᓇᐅᔭᑎᒍᓪᓗ ᐱᕈᕐᐸᓕᐊᒐᓱᐊᕐᓂᒧᑦ, ᑕᒪᒃᑯᐊᓕᒫᓪᓗ ᒪᓕᑦᓱᑎᒃ ᐱᔪᓐᓇᐅᑎᖃᕐᑎᑕᐅᒍᑎᓂᒃ ᑲᒪᒋᔭᖃᕐᑎᑕᐅᒍᑎᓂᓪᓗ ᓄᐃᑕᐅᒪᔪᓂᒃ ᐱᖁᔭᕐᒧᑦ ᐃᓕᖓᔪᒧᑦ ᐅᒪᔪᕐᓂᐊᓂᕐᒧᑦ, ᐃᖃᓗᑦᓯᐅᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᔦᒻᔅ ᐯᒥ ᑯᐯᒻᒥᓗ ᓄᓇᖁᑎᕐᑖᖃᒥᐅᔪᓂ (Q.R.S., D-13.1);
  • ᓯᕗᓕᕐᑎᐅᑎᑕᐅᑦᓱᓂ ᓄᓇᓕᐅᑉ ᐃᓗᐊᓂ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ ᐃᓚᐅᔪᓕᕆᔨᐅᓂᕐᒥᒃ ᑲᑎᒪᔨᐊᐱᓐᓄᑦ ᐊᐅᓚᑦᓯᔨᐅᑦᓱᑎᓪᓗ ᓄᑕᐅᓯᓕᑎᕆᔨᐅᑦᓱᑎᒃ ᓄᓇᓕᒥᑕ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ ᐃᓚᐅᔪᖁᑎᒥᑕ ᐊᓪᓚᑕᐅᓯᒪᐅᑎᖏᓐᓂᒃ, ᑕᒪᓐᓇᓕᒫᕐᓗ ᒪᓕᑦᓱᓂ ᐱᔪᓐᓇᐅᑎᖃᕐᑎᑕᐅᒍᑎᓂᒃ ᑲᒪᒋᔭᖃᕐᑎᑕᐅᒍᑎᓂᓪᓗ ᓄᐃᑕᐅᒪᔪᓂᒃ ᐱᖁᔭᕐᒧᑦ ᐃᓕᖓᔪᒧᑦ ᐊᓪᓚᓄᑦ ᑯᔩᓄᑦ, ᐃᓄᑐᐃᓐᓇᓄᑦ ᓇᔅᑳᐱᓄᓪᓗ (Q.R.S., ch.A 33.1);

ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑲᑐᑦᔨᖃᑎᒌᓐᓂᖓ ᐃᑲᔪᕐᓯᒪᔨᐅᔪᖅ ᓴᐳᑦᔨᓯᒪᔨᐅᑦᓱᓂ ᓄᓇᒥᒃ ᑎᒍᒥᐊᕐᑏᑦ ᐊᐅᓚᑦᓯᑎᓪᓗᒋᑦ ᐊᑦᔨᒌᖕᖏᑐᓂᒃ ᐱᓇᓱᐊᕋᑦᓴᓂᒃ, ᓄᓇᓕᓐᓂᓗ ᐱᔪᓐᓇᓯᑦᓯᐊᑎᑦᓯᒐᓱᐊᕐᑎᐅᓱᓂ ᓴᓇᕐᕈᑎᖃᕐᑎᓯᐊᕋᓱᐊᕐᓱᒋᓪᓗ ᑲᒪᒋᔭᖃᑦᓯᐊᕈᓐᓇᖁᒧᑦ ᓄᓇᖁᑎᒥᓂᒃ ᐱᕙᓪᓕᐊᑎᑦᓯᒐᓱᐊᕈᑎᐅᔪᓂᓪᓗ. ᓄᓇᕕᐅᑉ ᓇᓃᓐᓂᖓ ᓇᓗᓀᕐᑕᐅᓯᒪᒍᓯᖓᓗ ᒪᓕᑦᓱᒍ, ᓄᓇᓕᒥᒃ ᑎᒍᒥᐊᕐᑏᑦ ᐃᓚᐅᕙᑦᑐᑦᔪ ᑮᓇᐅᔭᑎᒍᑦ ᐱᕈᕐᐸᓕᐊᑎᑕᐅᒐᓱᐊᕐᓂᖓᓄᑦ ᓄᓇᕕᒻᒥ ᓄᓇᓖᑦ, ᐱᕙᓪᓕᑎᒐᓱᐊᕐᓱᒋᑦ ᓄᓇᕕᒻᒥᐅᑦ, ᑕᒪᕐᒥᒃ ᐃᓚᐅᔪᑎᑕᐅᔪᑦ ᓄᓇᒥᒃ ᑎᒍᒥᐊᕐᑎᓄᑦ. ᑌᒪᖕᖓᓂᑦ ᑖᓐᓇ ᑲᑐᑦᔨᖃᑎᒌᓐᓂᖅ ᐱᒋᐊᓚᐅᔪᑎᓪᓗᒍ, ᐊᑦᔨᒌᖕᖏᑐᑦ ᐱᓇᓱᐊᕋᑦᓭᑦ ᐱᒋᐊᕐᑎᑕᐅᓯᒪᓕᕐᑐᑦ ᐱᔭᕆᔭᐅᒍᓐᓇᓯᑦᓯᐊᓯᒪᑦᓱᑎᓪᓗ ᑖᑦᓱᒧᖓ ᑲᑐᑦᔨᖃᑎᒌᓐᓂᒧᑦ.

ᐃᓱᒪᒋᓗᒍ ᓴᓇᕐᕈᑎᐅᑉ ᐊᖏᖃᑎᒌᒍᑎᖓᑎᒍᑦ ᐱᕙᓪᓕᐊᑎᑦᓯᒍᑏᑦ ᑮᓇᐅᔦᑦ; ᑲᒪᔨᒻᒪᕇᑦ ᑮᓇᐅᔭᓕᕆᓂᕐᒥᒃ ᐃᓕᓐᓂᐊᑎᑕᐅᓂᖏᑦ; ᓄᓇᕕᓕᒫᒧᐊᖓᔪᑦ ᐃᓪᓗᓕᐅᕐᓂᒧᑦ ᓴᓇᓂᕐᒧᑦ ᒪᓕᒉᑦ ᐊᒻᒪᓗ ᓯᕗᓪᓕᐹᑦᓯᐊᖅ “ᐃᓪᓗᓕᐅᕐᓂᒧᑦ ᓴᓇᓂᕐᒧᑦ ᖃᓄᐃᓕᖓᒋᐊᖃᕈᑎᓂᒃ ᑐᑭᓯᒪᑎᑦᓯᒍᑎᒃ ᓄᓇᕕᒻᒥ”; ᐅᕝᕙᓗᓐᓃᑦ ᖃᐅᑕᒫᑦ ᐃᑲᔪᕐᓯᔭᐅᓂᖓ ᓄᓇᒥᒃ ᑎᒍᒥᐊᕐᑏᑦ ᐃᓂᓪᓚᑎᕆᐊᓪᓚᓂᕐᒥᒍᑦ; ᐅᕝᕙᓗᓐᓃᑦ ᐱᓇᓱᐊᖃᑎᒌᓚᖓᓂᕐᒧᑦ ᐊᖏᖃᑎᒌᒍᑎᒃ ᐊᑎᓕᐅᕈᑕᐅᒪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᖏᓐᓄᑦ ᐃᑉᐱᒋᔭᖃᑦᓯᐊᓕᐅᒥᒍᒪᒧᑦ ᑲᒪᒋᔭᖃᑦᓯᐊᓕᐅᒥᒍᒪᒧᓪᓗ ᓄᓇᐅᑉ ᐊᑐᕐᑕᐅᒍᒪᐅᑎᖏᓐᓂᒃ ᐸᕐᓇᓂᕐᒧᓗ ᓄᓇᓖᑦ ᐊᖏᓕᕙᓪᓕᐊᓂᕆᒋᐊᓕᖏᓐᓂᒃ.

ᐁᕆᓕ 2002-ᒥ, ᑯᐯᑉ ᑲᕙᒪᒃᑯᖓ ᐃᓄᐃᓪᓗ ᐊᑎᓕᐅᖃᑎᒌᑦᓯᒪᕗᑦ ᓴᓇᕐᕈᑎᐅᑉ ᐊᖏᖃᑎᒌᒍᑕᐅᓂᖓᓂᒃ, ᐃᓄᑦᑎᑐᑦ ᑖᓐᓇ ᐅᖃᐅᓯᖅ ᑐᑭᓕᒃ “ᐱᕙᓪᓕᐊᓂᕐᒧᑦ ᓴᓇᕐᕈᑎᒃ”. ᑖᓐᓇ ᐊᖏᖃᑎᒌᒍᑎᒃ, ᐊᑎᓕᐅᕐᑕᐅᒪᔪᖅ 25-ᓄᑦ ᐊᕐᕌᒍᓄᑦ ᐃᓕᖓᓂᐊᕐᓱᓂ ᓄᐃᑕᑎᑦᓯᒍᑎᐅᔪᖅ ᑯᐯᑉ ᐃᓄᐃᓪᓗ ᐊᔪᐃᓐᓇᖃᑎᒌᓐᓂᖓᓂᒃ ᐱᓇᓱᐊᖃᑎᒌᓐᓂᑯᑦ ᓯᕗᒧᐊᕈᒪᓂᕐᒧᑦ ᐊᑦᔨᒌᒥᒃ ᑕᑯᓐᓇᒐᖃᕋᓱᐊᓂᑯᑦ ᑮᓇᐅᔭᑎᒍᑦ ᐱᕈᕐᐸᓕᐊᓂᐅᔪᒥᒃ ᓄᓇᓖᓪᓗ ᐱᕙᓪᓕᐊᑎᑕᐅᓂᖓᓂᒃ.

ᑲᑐᑦᔨᖃᑎᒌᓐᓂᖅ ᑲᒪᒋᔭᖃᕐᑐᖅ ᑎᒍᓚᔨᐅᑦᓱᓂ ᕿᒥᕐᕈᔨᐅᑦᓱᓂᓗ ᓄᓇᓕᒻᒥᒃ ᐱᕙᓪᓕᐊᑎᑦᓯᒐᑐᐊᕈᑕᐅᒪᔪᓂᒃ ᓄᐃᑕᐅᕙᑦᑐᓂᒃ ᓄᓇᒥᒃ ᑎᒍᒥᐊᕐᑎᓄᑦ ᑮᓇᐅᔭᕐᑖᕈᒪᐅᑎᐅᓲᓂᒃ ᓴᓇᕐᕈᑎᐅᑉ ᑮᓇᐅᔭᖃᑎᖏᓐᓂᑦ ᐊᒻᒪᓗ ᐃᒣᓕᖓᒋᐊᖁᔨᒍᑎᓕᐅᕐᑎᐅᓱᓂ ᒪᑭᕝᕕᓄᑦ ᑕᒪᒃᑯᐊ ᑮᓇᐅᔭᕐᑖᕈᒪᐅᑏᑦ ᐊᖏᕐᑕᐅᒍᓐᓇᖁᓪᓗᒋᑦ.

ᑲᑐᑦᔨᖃᑎᒌᓐᓂᖅ ᑎᓕᔨᓲᖑᒻᒥᔪᖅ ᑲᑎᒪᔨᓂᒃ ᑭᒡᒐᑐᕐᑎᐅᓂᐊᕐᑎᓗᒋᑦ ᐊᑦᔨᒌᖕᖏᑐᓂ ᐃᓄᐃᑦ ᐱᓇᓱᐊᕐᕕᖁᑎᖏᓐᓂ ᑲᕙᒣᓪᓗ ᐱᓇᓱᐊᕐᕕᖁᑎᖏᓐᓂ, ᐱᓇᓱᐊᖃᑎᐅᖁᒧᑦ ᐊᑦᔨᒌᖕᑐᓂ ᓱᓇᓱᐊᕐᓂᐅᔪᓂ ᑫᓪᓗᑐᐃᒐᓱᐊᕈᑕᐅᔪᓂ ᑐᕌᒐᖏᓐᓂᒃ ᑲᑐᑦᔨᖃᑎᒌᓐᓂᐅᑉ ᐃᓚᐅᔪᖁᑎᖏᑦᑕᓗ, ᐱᓗᐊᕐᑐᒥᒃ ᐅᑯᓇᓂ:

  • ᓄᓇᕕᒻᒥ ᐅᔭᕋᓐᓂᐊᕋᑦᓴᓯᐅᕐᓂᒧᑦ ᑮᓇᐅᔭᖁᑏᑦ
  • ᑲᑐᑦᔨᓂᖅ ᐱᕙᓪᓕᐊᓂᕐᒧᑦ ᑲᑎᒪᔨᓂ ᐊᒻᒪᓗ ᑲᑎᕕᐅᑉ ᓄᓇᓕᓐᓂᒃ ᐱᕙᓪᓕᐊᑎᑦᓯᓂᕐᒧᑦ ᑲᑎᒪᔨᖏᓐᓂ
  • ᓄᓇᕕᐅᑉ ᐅᒪᔪᕐᓯᐅᑎᖏᑦᑕ ᑲᑐᑦᔨᖃᑎᒌᓐᓂᖓᓂ