ᐅᒪᔪᕐᓯᐅᓂᖅ, ᐃᖃᓗᑦᓯᐅᓂᖅ ᒥᑭᒋᐊᕐᓂᐊᓂᕐᓗ

ᓄᓇᕕᒃ ᓯᓚᕐᔪᐊᓕᒫᒥ ᖃᐅᔨᒪᔭᐅᒍᑎᖃᑦᓯᐊᖁᖅ ᓱᖃᑦᓯᒋᐊᕐᑐᐸᑦᑐᓂᒃ ᐅᒪᔪᕐᓯᐅᒋᐊᕐᑐᓱᑎᒃ ᐃᕐᖃᓴᕆᐊᕐᑐᓱᑎᓪᓗ. ᐱᒻᒪᕆᐊᓘᕗᖅ ᑕᒪᐅᖓ ᓂᐅᕐᕈᓕᕈᕕᑦ, ᐃᑲᔪᕐᓯᒪᑦᓯᐊᕆᐊᖃᕐᑐᑎᑦ ᓲᓱᒋᔭᖃᑦᓯᐊᓂᒃᑯᑦ ᐊᕙᑎᑦᑎᓂᒃ ᑕᒪᓂᒥᐅᓪᓗ ᐃᓅᒍᓯᖓᓐᓂᒃ, ᐊᒻᒪᓗ ᑌᒪᖕᖓᓕᒫᖅ ᒪᓕᑦᓯᐊᓂᒃᑯᑦ ᓄᓇᓕᐅᑉ ᒪᓕᒐᓕᐊᕆᓯᒪᔭᖏᓐᓂᒃ ᐃᓕᖓᔪᓂᒃ ᓱᖃᑦᓯᒋᐊᕐᑐᓯᒪᑦᓱᑎᒃ ᐅᒪᔪᕐᓯᐅᑎᓄᑦ ᐃᕐᖃᓴᕐᑎᓄᓪᓗ.

ᓄᓇᒥᒃ ᑎᒍᒥᐊᕐᑏᑦ ᓄᓇᓕᓐᓂ ᐊᒻᒪᓗ ᑲᕙᒣᑦ ᐱᔪᓐᓇᐅᑎᖃᕐᑎᓯᒍᑎᖏᑦ ᓱᖃᑦᓯᓂᒃᑯᑦ ᐅᒪᔪᕐᓯᐅᒋᐊᕐᑐᓂᒃ ᐃᕐᖃᓴᕆᐊᕐᑐᓂᓪᓗ ᐊᑐᕐᑕᐅᓯᐊᓪᓚᕆᒋᐊᓖᑦ. ᐱᔪᓐᓇᐅᑏᑦ ᐊᑭᖏᑦ, ᒪᓕᒉᑦ ᐃᓂᓪᓚᖓᑎᑦᓯᒍᑏᓪᓗ ᐊᑦᔨᒌᓲᖑᖕᖏᑐᑦ ᓄᓇᓕᓐᓂ. ᖃᐅᔨᒋᐊᑦᓯᐊᕈᒪᒍᕕᑦ ᐃᓗᓐᓈᒍᑦ ᓄᓇᒥᒃ ᑎᒍᒥᐊᕐᑎᑯᓪᓗ ᐱᔪᓐᓇᐅᑎᖃᕐᑎᓯᒍᑎᖏᓐᓂᒃ, ᖃᐅᔨᒐᓱᐊᕐᕕᖃᕈᓐᓇᑐᑎᑦ ᑖᒃᑯᐊ ᐊᑐᓂ ᓄᓇᒥᒃ ᑎᒍᒥᐊᕐᑏᑦ ᑐᑭᓯᒋᐊᕐᑕᐅᕕᖓᓂ ᑌᔭᐅᔪᒥ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑏᑦ ᑕᑯᒋᐊᕐᑕᐅᕕᖓ.

ᐱᔪᓐᓇᐅᑏᑦ ᓄᑮᓪᓗ ᑳᑕᑰᔨ 1 ᓄᓇᖏᓐᓂ

ᐅᒪᔪᕐᓯᐅᓂᕐᒧᑦ, ᐃᖃᓗᑦᓯᐅᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᐱᔪᓐᓇᐅᑏᑦ

ᐃᓄᐃᑦ ᑭᓯᐊᓂ ᐱᔪᓐᓇᐅᑎᖃᓪᓚᕆᑦᑐᑦ ᐅᒪᔪᕐᓯᐅᕈᓐᓇᓂᕐᒥᒃ ᐃᖃᓗᑦᓯᐅᕈᓐᓇᓂᕐᒥᓗ ᑳᑕᑰᔨ 1 2-ᓗ ᓄᓇᖏᓐᓂ.

ᑖᓐᓇ ᐱᔪᓐᓇᐅᑎᖃᕐᑎᑕᐅᓂᖓ ᐃᓄᐃᑦ ᐱᓯᒪᔪᖅ ᔦᒻᔅ ᐯ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᓂᑦ ᐊᒻᒪᓗ ᐱᖁᔭᕐᒥᑦ ᐃᓕᖓᔪᒥᑦ ᐅᒪᔪᕐᓯᐅᓂᕐᒧᑦ, ᐃᖃᓗᑦᓯᐅᓂᕐᒧᑦ ᒥᑭᒋᐊᓂᐊᓂᕐᒧᓗ ᔦᒻ ᐯᒥ ᑯᐯᓪᓗ ᓄᓇᖁᑎᑖᕐᖃᒥᖏᓐᓂ (Q.R.S.c.D-13.1)

ᐊᖏᖃᑎᒌᓐᓂᒧᑦ ᐃᓚᐅᔫᖕᖏᑐᑦ ᓄᓇᓯᒪᔫᒐᑎᒃ ᐊᑐᕈᓐᓇᓯᐊᕐᑐᑦ ᑳᑕᑰᔨ 1 ᓄᓇᖁᑎᖏᓐᓂᒃ, ᑭᓯᐊᓂ ᐅᒪᔪᕐᓯᐅᕆᐊᖃᖕᖏᑐᑦ ᐃᖃᓗᑦᓯᐅᕆᐊᖃᕋᑎᓪᓗ ᑳᑕᑰᔨ 1-ᖑᓂᕋᕐᑕᓂ, ᓄᓇᒥᒃ ᑎᒍᒥᐊᕐᑎᑯᓐᓄᑦ ᐊᖏᕐᑕᐅᓚᕆᑦᓯᒪᕐᖄᕋᑎᒃ ᓱᖃᑦᓯᓂᒃᑯᓗ ᐅᒪᔪᕋᓱᐊᕈᓐᓇᓂᕋᕐᑕᐅᖄᕋᑎᒃ.

ᓄᓇᒥᒃ ᑎᒍᒥᐊᕐᑎ ᒪᓕᒐᓕᐅᕈᓐᓇᑐᖅ ᐊᑭᖃᕐᑎᓯᒍᓐᓇᓱᓂᓗ ᐱᒍᓐᓇᑎᑦᓯᒍᑎᒥᓂᒃ.

ᐊᑐᐊᕐᓯᒋᐊᓪᓛᕆᑦ

ᐅᒪᔪᕐᓯᐅᕆᐊᕐᕖᑦ ᒪᙯᕝᕖᑦ

ᐃᓄᐃᑦ ᑭᓯᐊᓂ ᐊᐅᓚᑦᓯᒍᓐᓇᑐᐃᑦ ᐅᒪᔪᕐᓯᐅᕆᐊᕐᕕᓂᒃ ᒪᙯᕝᕕᓂᒃ ᑳᑕᑰᔨ 1 2-ᓗ ᓄᓇᖏᓐᓂ.

ᓄᓇᓕᑐᖃᑦᓴᔭᐅᖕᖏᑐᑦ ᐱᕕᖃᕐᑎᑕᐅᒍᓐᓇᑐᑦ ᐊᐅᓚᑦᓯᓂᕐᒥᒃ ᒪᙯᕝᕕᒥᒃ ᑳᑕᑰᔨ 1 2-ᓗ ᓄᓇᖏᓐᓂ ᐊᖏᕐᑕᐅᓯᒪᑦᓯᐊᑐᐊᕈᑎᒃ ᓄᓇᒥᒃ ᑎᒍᒥᐊᕐᑎᒧᑦ ᓄᓇᖁᑎᓕᒻᒧᑦ, ᑖᓐᓇ ᐊᖏᕈᑎᒃ ᐊᓪᓚᓯᒪᔫᒋᐊᓕᒃ ᑐᑭᑖᕈᑎᐅᓗᓂ.

ᐱᐅᓯᐅᔪᕐᑎᒍᑦ, ᐃᓄᐃᑦ ᑲᒪᒋᔭᖃᕐᑐᑦ ᐃᓗᓐᓀᓂᒃ ᓄᑖᓂᒃ ᒪᙯᕝᕕᓂᒃ ᑳᑕᑰᔨ 1 2-ᓗ ᓄᓇᖏᓐᓂ, ᓄᓇᓕᑐᖃᑦᓴᔭᐅᖕᖏᑐᑦ ᐃᓚᐅᑐᐊᕈᑎᒃ ᐱᓇᓱᐊᖃᑕᐅᓂᒃᑯᑦ ᓇᒻᒥᓂᖃᕆᐊᓪᓚᕕᖃᖕᖏᑐᑦ 49% ᐅᖓᑖᓄᕐᑐᓂᒃ ᑐᖕᖓᕕᐅᔪᓂᒃ.

ᒪᙯᕝᕕᒃ ᓄᐃᑕᐅᔪᖅ ᑳᑕᑰᔨ 1 2-ᓗ ᓄᓇᖏᓐᓂ ᐊᖏᕐᑕᐅᓯᒪᕐᖄᕆᐊᓕᒃ ᓄᓇᒥᒃ ᑎᒍᒥᐊᕐᑎᑯᓐᓄᑦ, ᑖᓐᓇ ᒪᙯᕝᕕᒃ ᓇᒻᒥᓂᕆᔭᐅᑦᓯᐊᕋᓗᐊᕐᐸᑦ ᐃᓗᓐᓇᖓ ᐃᓄᑦᑎᒍᑦ ᐃᓚᐅᔪᒍᑎᓕᒻᒧᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᒍᑦ. ᒪᙯᕝᕕᖃᕈᓐᓇᐅᑏᑦ ᑐᓂᔭᐅᒋᐊᓪᓚᕕᖃᖕᖏᑐᑦ ᑯᐯᒃᑯᑦ ᐅᒪᔪᓕᕆᔨᒃᑯᖏᓐᓄᑦ ᓄᓇᒥᒃ ᑎᒍᒥᐊᕐᑏᑦ ᑐᑭᑖᕈᑎᖓᒍᑦ ᐊᖏᕐᑕᐅᓯᒪᖕᖏᑐᐊᕐᐸᑦ ᐊᐅᓚᑕᐅᒍᒪᓂᖓ ᒪᙯᕝᕕᐅᑉ.

ᑮᓇᐅᔭᓕᐅᕋᓱᐊᕈᑎᖃᕐᓂᑯᑦ ᐅᒪᔪᕐᓯᐅᓂᕐᒥᒃ ᐃᖃᓗᑦᓯᐅᓂᕐᒥᓗ ᐱᔪᓐᓇᐅᑎᖃᕐᓂᖅ

ᒪᓕᒐᕐᑎᒍᑦ ᓄᐃᑕᐅᒪᔪᕐᑎᒍᑦ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓄᑦ, ᑮᓇᐅᔭᓕᐅᕋᓱᐊᕈᑎᐅᓗᓂ ᐃᖃᓗᓐᓂᐊᕕᒃ ᐅᒪᔪᕐᓂᐊᕕᓪᓘᓃᑦ ᐊᐅᓚᑕᐅᒋᐊᓪᓚᕕᖃᖕᖏᑐᖅ ᑳᑕᑰᔨ 1 2-ᓗ ᓄᓇᖏᓐᓂ ᐊᖏᕐᑕᐅᓯᒪᓂᖃᖕᖏᓗᓂ ᓄᓇᒥᒃ ᑎᒍᒥᐊᕐᑎᒧᑦ.

ᐱᔪᓐᓇᐅᑏᑦ ᓄᑮᓪᓗ ᑳᑕᑰᔨ 2 ᓄᓇᖏᓐᓂ

ᐅᒪᔪᕐᓯᐅᓂᕐᒧᑦ, ᐃᖃᓗᑦᓯᐅᓂᕐᒧᑦ ᒥᑭᒋᐊᕐᓂᐊᓂᕐᒧᓗ ᐱᔪᓐᓇᐅᑏᑦ

ᐃᓄᐃᑦ ᑭᓯᐊᓂ ᐱᔪᓐᓇᐅᑎᖃᓪᓚᕆᑦᑐᑦ ᑳᑕᑰᔨ 2 ᓄᓇᖏᓐᓂ, ᐱᔪᓐᓇᐅᑎᖃᓪᓚᕆᑦᑎᑕᐅᑦᓱᑎᒃ ᐅᒪᔪᕐᓯᐅᕈᓐᓇᓂᕐᒥᒃ ᐃᖃᓗᑦᓯᐅᕈᓐᓇᓂᕐᒥᒃ ᒥᑭᒋᐊᕐᓂᐊᕈᓐᓇᓂᕐᒥᓗ ᑖᒃᑯᓇᓂ ᓄᓇᓂ, ᐃᓚᖃᕐᑎᓗᒋᑦ ᐱᔪᓐᓇᐅᑎᑖᖑᓯᒪᔪᓂᒃ ᐊᓪᓚᓯᒪᔪᒥ 24-ᒥ ᔦᒻᔅ ᐯ ᑯᐯᑉ ᑕᕐᕋᖓᑕᓗ ᐊᖏᖃᑎᒌᓐᓂᖓᓂ.

ᐊᖏᖃᑎᒌᓐᓂᒧᑦ ᐃᓚᐅᔫᖕᖏᑐᑦ ᐊᑐᕈᓐᓇᕕᖃᕐᑐᑦ ᑳᑕᑰᔨ 2 ᓄᓇᖏᓐᓂᒃ, ᑭᓯᐊᓂ ᓱᖃᑦᓯᓂᒃᑯᑦ ᐅᒪᔪᕐᓯᐅᒋᐊᓪᓚᕕᖃᖕᖏᑐᑦ ᐃᖃᓗᑦᓯᐅᕆᐊᓪᓚᕕᖃᕋᑎᓪᓗ ᑳᑕᑰᔨ 2 ᓄᓇᖏᓐᓂ, ᐊᖏᕐᑕᐅᓯᒪᕐᖄᕆᐊᓖᑦ ᑌᒣᓗᓚᖓᑐᐊᕈᑎᒃ ᓄᓇᒥᒃ ᑎᒍᒥᐊᕐᑎᒧᑦ ᑕᒪᒃᑯᓂᖓ ᓄᓇᖁᑎᓕᒻᒧᑦ. ᓄᓇᒥᒃ ᑎᒍᒥᐊᕐᑎ ᒪᓕᒐᓕᐅᕈᓐᓇᑐᖅ ᐊᑭᖃᕐᑎᓯᒍᓐᓇᓱᓂᓗ ᐱᒍᓐᓇᑎᑦᓯᒍᑎᒥᓂᒃ.

ᐅᒪᔪᕐᓯᐅᕆᐊᕐᕖᑦ ᒪᙯᕝᕖᑦ

(ᑳᑕᑰᔨ 1 ᓄᓇᖏᑦᑕ ᒪᓕᒐᖏᓐᓄᑦ ᐊᔨᒋᔭᐅᔪᖅ)

ᑮᓇᐅᔭᓕᐅᕋᓱᐊᕈᑎᖃᕐᓂᑯᑦ ᐅᒪᔪᕐᓯᐅᓂᕐᒥᒃ ᐃᖃᓗᑦᓯᐅᓂᕐᒥᓗ ᐱᔪᓐᓇᐅᑎᖃᕐᓂᖅ

(ᑳᑕᑰᔨ 1 ᓄᓇᖏᑦᑕ ᒪᓕᒐᖏᓐᓄᑦ ᐊᔨᒋᔭᐅᔪᖅ)

 

ᑐᑭᓯᒋᐊᕐᕕᓭᑦ ᖃᕆᑕᐅᔭᒃᑯᑦ